Л.Оюун-Эрдэнэ: Монгол Улсад авто замын бүтээн байгуулалтын хоёр дахь үе эхэлж байна

Ерөнхий сайд Л.Оюун-Эрдэнэ өчигдөр Сүхбаатар аймагт ажилласан бол өнөөдөр Хэнтий аймагт ажиллаж байна. Засгийн газраас “Шинэ сэргэлтийн бодлого”-ын Боомтын сэргэлтийн хүрээнд улсын хэмжээнд хилийн 14 боомтыг авто болон төмөр замаар холбох томоохон зорилтыг дэвшүүлэн ажиллаж байгаа. Эдгээрийн нэг Хэнтий аймгийн Чингис-Бэрх-Ульхан боомт чиглэлийн 318.3 км авто замын бүтээн байгуулалт юм. Уг авто замын эхний 70 км буюу Чингис-Бэрх чиглэлийн хатуу хучилттай авто зам бэлэн болсон. Үргэлжлэл 248.3 авто замын төслийг улсын төсвийн хөрөнгө оруулалтаар хэрэгжүүлэх бөгөөд Ерөнхий сайд Л.Оюун-Эрдэнэ Хэнтий аймгийн Норовлин суманд өнөөдөр ажиллахдаа бүтээн байгуулалтыг нь эхлүүллээ.

Ерөнхий сайд Л.Оюун-Эрдэнэ "Монгол Улсад авто замын бүтээн байгуулалтын хоёр дахь үе эхэлж байна. Энэ бол бүх боомтуудаа автозамаар холбох ажил юм. Стратегийн боомтуудаа төмөр замаар холбож, Алтанбулаг, Замын-Үүдээ хурдны замаар холбох зорилт тавьж байна. Энэ ажлыг бид аль болох богино хугацаанд хийж гүйцэтгэх хэрэгтэй. Өнөөдөр Чингис хот-Ульхан боомтыг холбох замын ажил эхэлж байна. Энэ зам бол Хэнтий аймгийн аялал жуулчлалын гол маршрут, зүүн гурван аймгийн хөгжилд чухал ач холбогдолтой" гэлээ.


Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд eagle.mn хариуцлага хүлээхгүй.

Сэтгэгдэл бичих (0)