29 орны 531 иргэнийг Монгол Улсаас албадан гаргажээ

Гадаадын иргэн, харьяатын газраас энэ онд хууль бусаар оршин суусан болон хөдөлмөр эрхэлсэн гадаадын 29 орны 531 иргэнийг албадан гаргаад байна. Үүнийг олонх нь буюу 372 нь БНХАУ-ын иргэн байгаа бол БНАСАУ-ын 42, ОХУ-ын 14, ХБНГУ-ын 8, Австралийн 10, АНУ-ын 15 иргэн байсныг тус газрын дарга Д.Мөрөн хэллээ. Тус байгууллагын хяналт шалгалтаас гадна, Зөрчлийн тухай хуулиар хууль бусаар хөдөлмөр эрхлэхэд оноох торгуулийн хэмжээ нэмэгдсэнээр жилээс жилд дээр зөрчил багасч байгаа гэв. 2018 оны арванхоёрдугаар сарын 21-ний байдлаар Монгол Улсад 123 улсын 23 мянга 486 иргэн оршин сууж байна. Энэ нь Үндэсний аюулгүй байдлын зөвлөлөөс баталсан Монгол Улсад оршин суух гаднын иргэдийн хяналтын тоонд хүрээгүй байгаа гэв.

Тус газраас 2018 оны байдлаар эрх зүйн орчныг сайжруулах чиглэлд бусад байгууллагуудтай хамтран ажиллаж ирсэн байна. Тухайлбал, гадаадын иргэний эрх зүйн байдлын тухай хуулийн дагалдах гурван журам болох Монгол Улсад оршин суух зөвшөөрөл, виз олгох журам, хууль тогтоомж зөрчсөн гадаадын иргэдийг албадан гаргах зэрэгт нэмэлт өөрчлөлт оруулсан юм байна.

Аялал жуулчлалыг хөгжүүлэх чиглэлд нэг сая жуулчин хүлээн авна гэсэн зорилт тавьсан. Энэ зорилтыг хэрэгжүүлэхийн тулд виз олгох журмын шаардлагыг хөнгөвчилж, хөрөнгө оруулагч нарт тавигдаж буй шаардлагыг өөрчилсөн байна. Монгол Улсад бодитой хөрөнгө оруулалт хийж буй гаднын иргэдийг тус газрын зүгээс дэмжиж ажиллана гэв.

Монгол Улсад оруулсан хөрөнгө нь Монгол Улсдаа шингэх, ажлын байр бий болгож, түүндээ монгол хүнийг ажиллуулах зэрэг шаардлага тавигдсан байна. Энэ журам нь 2018 оны долдугаар сараас мөрдөгдөж байгаа аж.

Дорнодод хятадууд мал маллан амьдарч байна уу

“Дорнод аймагт хятадууд олон боллоо. Тэд мал маллан амьдарч байна” гэсэн мэдээлэл сошиал орчин тархаад байгаад тус газрын дарга энэ үеэр хариу өгсөн юм. Дорнод аймагт нэг барга гэр бүл байгаа бөгөөд Өвөр монголоос манай улсын харьяат болох хүсэлтэй орж иржээ. Монгол угсаатай тэд 700 гаруй малаа маллан амьдарч байгаа юм байна. Харьяат болохын тулд манай улсад хамгийн доод тал нь таван жил амьдарсан байх зэрэг өндөр шаардлага тавьдаг тул одоогоор оршин сууж байгаа гэдгийг онцоллоо.

Мөн Монгол Улсын харьяат болох гэхээсээ илүүтэй харьяатаас гарч байгаа хүний тоо олон байна. Жилдээ 4-5 хүн манай улсын харьяат болж байгаа бол гарч байгаа нь жилдээ 400 орчим байна. Тухайлбал, энэ жил 357 хүн Монгол Улсын харьяатаас гарсан. Тодруулбал, Герман, Солонгос, Австри, Нидерланд гэх зэрэг. Харин ОХУ-ын хоёр иргэн, Балбын нэг иргэн Монгол Улсын харьяат болжээ. 1994 оноос хойш Монгол Улсын Ерөнхийлөгчийн зарлигаар 240 хүн Монгол Улсын харьяат болсон байна.

Техник технологийн чиглэлд олон улсын стандартын шинэ системийг нэвтрүүлэхээр ажиллаж байгаагаа тус газрынхан ярьж байлаа. Үүнээс гадна, хилийн чанадад Монгол Улсыг зорихоор бүртгүүлмэгц гадаад иргэдийн мэдээлэл Монголд ирэх системийг суурилуулахад бэлтгэж байгаа аж. Ингэснээр контрбанд зэрэг гэмт хэрэгт холбогдож байсан буюу өмнө нь албадан гаргаж байсан зэрэг Монгол Улсад нэвтрүүлэх боломжгүй иргэдийг тэр дор нь хариу илгээн хүлээн авах боломжгүйгээ мэдэгддэг болно. Одоогийн байдлаар ашиглаж байгаа систем нь  нислэг хөөрснөөс хойш 10-15 минутын дараа тухайн онгоцонд зорчиж буй иргэний мэдээллийг манай улс хүлээн авдаг юм байна.


Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд eagle.mn хариуцлага хүлээхгүй.

Сэтгэгдэл бичих (1)

  1. Өнгөрсөн 25 жилд 240 хүн манай улсын иргэншилтэй болсон гэдэг бол бас л сайн үзүүлэлт гэж бодож байна. Ядаж л цаасан дээр буюу албан ёсны журмаараа. Мөн оршин суух эрхтэй нь ч гэсэн 23-24 мянга гэдэг ч боломжийн. Гадны эрсдэл бол гайгүй гэж дүгнэж болохоор юм. Гэтэл!!!!!!!!!! Хүн амын тал нь оршин сууж буй УБ хотын утаанаас болж хордож үндэс угсаа тасрах эрсдэлд ороод байна. Бас 1,5 сая кв.км нутагт тархан суусан хөдөөгийн иргэд нь цус ойртоод удмын сан доройтчихоод байна. Энэ бол манай улс дотроосоо хүн ам зүйн сүйрэлд орж байгааг харуулж байна. Дээрээс нь улс төрийн, нийгмийн, соёлын, эдийн засгийн гэх мэт бусад эрсдлээ нэмбэл Монгол улс минь мандахгүй юмаа гэхэд дундаж хэмжээнд ч оршин тогтноход хэцүү болжээ гэдгийг масс хэзээ ойлгох юм бол доо. Ойлгох цагт хэдий нь оройтсон байх болов уу гэж эмзэглэж байна.

    0 0 Хариу бичих