Украйн Авлигын эсрэг шүүхтэй боллоо

Украин улс Авлигын эсрэг дээд шүүхийн үйл ажиллагааг өнгөрсөн пүрэв гарагт эхлүүлж, нээлтэд нь ерөнхийлөгч Владимир Зеленський өөрийн биеэр оролцон шинээр байгуулагдаж байгаа байгууллагыг олон улсад тус улсын нэр хүндийг өргөх, чухал байгууллага хэмээн онцолжээ.

Өндөр түвшний авлигын гэмт хэрэгтэй тэмцэхийг 2013, 2014 оноос хойш тус улс дахь барууны бодлогыг дэмжигчид үндсэн шаардлагаа болгосоор байгаа бол дээр дурдсан авлигын эсрэг шүүхээс гадна, авлигын гэмт хэргийг мөрдөх Мэргэшсэн мөрдөн шалгах байгууллага (NABU), Прокурорын байгууллага (SAPU)-ыг байгуулж, авлигатай тэмцэх арга барил, бүтцээ шинэчлээд байгаа юм.

Украин улсын хууль тогтоох байгууллага нь 2018 оны 6 дугаар сард авлигын хэргээр дагнан ажилладаг шүүх байгуулах эсэх талаар санал хурааж, амаргүй үйл явцыг даван туулж энэхүү шийдвэрийг гаргасан байна. Харин АНУ-ын Төрийн департамент уг үйл явдалтай холбогдуулан “Бие даасан авлигын эсрэг шүүх байгуулснаар Украйн улсын үндэсний аюулгүй байдал, хөгжил цэцэглэлт, ардчиллын хөгжилд чухал үйл явдал боллоо” гэжээ.

Тус шүүхийг өмнө нь Харьков хотын Печенеги дүүргийн шүүхийн шүүгчээр ажиллаж байсан Елена Танасевич даргалж байгаа ба түүний Украины Чөлөөт радиод өгсөн ярилцлагад дурьдсанаар шүүх үйл ажиллагаагаа эхэлсэн даруйд 3000 орчим авлигын гэмт хэрэг хүлээн авах төлөвтэй байгааг тэмдэглэсэн байна.

Ерөнхийлөгч Зеленськийгийн мэдэгдсэнээр авлигын эсрэг шүүхийн үйл ажиллагаанд парламентын зүгээс дэмжлэг үзүүлэн ажиллахаас гадна зөвхөн “Өндөр төвшний авлигын гэмт хэрэг”-т төвлөрөн ажиллах болно гэжээ.


Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд eagle.mn хариуцлага хүлээхгүй.

Сэтгэгдэл бичих (1)

  1. зөв. манай бас ингэмээр. Манайд Шүүх дээр том хэргүүд дарагдаж хөөн хэлэлцэх хугацаа гэгчээр мултардаг болон гэж АТГ өнөөдөр мэдэгдсэн.

    0 0 Хариу бичих