Сонсголонгийн төмөрбетон хос гүүрийг ашиглалтад оруулж хөдөлгөөнийг нээлээ

БНХАУ-ын Засгийн газрын хөнгөлөлттэй зээлийн хөрөнгөөр хэрэгжүүлж буй төсөл хөтөлбөрүүдийн нэг болох Сонсголонгийн төмөрбетон хос гүүрийн зам барилгын ажил дуусч өнөөдөр хөдөлгөөнийг нээлээ.

Сонсголонгийн гүүр нь Нийслэлийн авто замын сүлжээний баруун хэсгийн босоо тэнхлэгийн гол замын сүлжээ болох Сонсголонгийн 5.5 км авто замд байрлах бөгөөд хотын Яармагийн дэд төвийн бүтээн байгуулалтын ажилд дэмжлэг үзүүлэх, үйлдвэрлэлийн бүс, Хөшигийн хөндийн олон улсын шинэ нисэх онгоцны буудал руу зорчих хөдөлгөөнийг эрчмийг нэмэгдүүлж, төвлөрлийг бууруулах,тээврийн хэрэгслийн аюулгүй байдлыг сайжруулж түгжрэлийг бууруулах чухал ач холбогдолтой байгууламж юм.

1971 оноос шинэчлэлт хийгдээгүй байсан гүүрийн засварын ажлыг 2018 оны 5 дугаар сарын 01-ний өдөр эхлүүлж, төслийн 2 эгнээ гүүрийн барилгын ажлыг 2019 оны 07 дугаар сарын 09-ны өдөр хөдөлгөөнийг нээсэн. Хоёр сарын хугацаанд гүүрийн засварын ажлыг бүрэн гүйцэтгэж 4 эгнээ төмөрбетон хос гүүрийг өнөөдөр ашиглалтад өгч байна.

Сонсголонгийн төмөрбетон хос гүүр нь 30м алгасалтай, Т-хэлбэрийн угсармал дам нуруутай, 11м өргөн, 2 эгнээ зорчих хэсэг, явган зам, гэрэлтүүлэг бүхий гүүрэн байгууламж юм. Барилгын ажлын гүйцэтгэгчээр “Бээжин Юни-Констракшн Групп” ХХК, гүүрэн байгууламжийн үндэсний анхны компани болох “Гангүүр” ХХК, хяналтын зөвлөх үйлчилгээний компаниар “Гуанжоу Ванан Констракшн Сүпервишн” компаниуд богино хугацаанд гүйцэтгэж дуусгалаа.


Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд eagle.mn хариуцлага хүлээхгүй.

Сэтгэгдэл бичих (0)