Дэлхийн хотуудын агаарын чанарын ажиглагч байгууллагатай хамтран ажиллана

Нийслэлийн Засаг даргын Хөгжлийн бодлого хариуцсан нэгдүгээр орлогч Ж.Батбаясгалан дэлхийн хотуудын агаарын чанарын ажиглагч /GUAPO/ байгууллагын захирал Элса Мартаяныг өчигдөр хүлээн авч уулзжээ. Уулзалтад Бүгд Найрамдах Франц Улсаас Монгол Улсад суугаа Онц бөгөөд Бүрэн эрхт Элчин сайд Филипп Мэрлин болон НЗДТГ-ын Гадаад харилцаа, хамтын ажиллагааны хэлтсийн дарга Д.Чинзориг, Агаарын бохирдолтой тэмцэх газрын дарга Х.Галымбек нар байлцсан аж.

Нийслэлийн Засаг даргын Хөгжлийн бодлого хариуцсан нэгдүгээр орлогч Ж.Батбаясгалан хатагтай Элса Мартаяныг хүрэлцэн ирсэнд талархал илэрхийлээд, агаар орчны бохирдлыг бууруулах чиглэлээр хийж хэрэгжүүлж буй ажлуудын талаар товч мэдээлэл өгчээ. Тэрбээр “Агаарын бохирдлыг бууруулахад шат дараатай ажлуудыг хэрэгжүүлж байна. Агаар, орчны бохирдлыг бууруулахад метропол хотуудтай туршлага солилцоход гүүр болж хамтарч ажиллахыг хүсэх байна” хэмээлээ.

Улаанбаатар хот дэлхийн хотуудын агаарын чанарыг ажиглагч байгууллагын гишүүнээр 2019 онд элссэн юм. Тус байгууллага нь дэлхийн метрополь хотуудын дундын мэдээллийн санг байгуулж агаарын чанарын талаар мэдээлэл цуглуулан, харилцан туршлага солилцдог аж. Мөн тус байгууллага нь улс орны нийслэл болон хотуудын олон талт харилцааг олон улсын түвшинд дэмжин ажилладаг байна.

Хатагтай Элса Мартаян дундын мэдээллийн санд Улаанбаатар хотын агаарын чанарын өнөөгийн мэдээллийг оруулахыг хүсээд бусад улс орнуудтай харилцан туршлага солилцоход дэмжиж ажиллана гэдгээ илэрхийлэв. Мөн Улаанбаатар хотын нэг дүүрэг хороонд агаарын бохирдлын судалгаа хийх туршилтын төсөл хэрэгжүүлэх саналтай байгаагаа хэлжээ.


Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд eagle.mn хариуцлага хүлээхгүй.

Сэтгэгдэл бичих (0)